Górny Ślonsk jest łod downa na fali. Idymy durś do przodku jak mało kej. We sejmie tyz jak na razie cisnom projekt ustawy o uznaniu ślonskigo za jynzyk regionalny i zdo sie, co i we senacie to szafnymy i wszystko bydzie zależało juz ino łod prezydynta. No chyba, że gupiym zachowaniym zawalom tu coś inksze ważne Ślonzoki, a jak widza robiom co mogom.
Wydowac by się mogło, co we taki sytuacji we wyborach samorządowych Ślonzoki tyz łod downa piyrszy roz w końcu coś ukulajom. I tak by boło, jakby politykom u nos zajmuwali się ludzie mondrzy, a zocni, a nie take lebry i stare ułty, co ino paczom jak zrobić cyrkus.
Pacza w lokalu wyborczym na karta z kandydatami do sejmiku śląskiego. I co widza? Jak zawsze dwa ugrupowania ze Ślonskym we nazwie: Ruch Autonomii Śląska i Ślonzoki Razem (cymu Razem, a nie Razym - tego niy poradza spokopić, tym barzi, co Razem w polityce i to niy ino u nos kojarzy sie bardzo źle). Ale to mni ważne. Ftoryś roz ugrupowania durś łosprawiajonce ło Ślonsku, ftorych ludzie na prawo i lewo asom sie jako to przajom Ślonskowi idom do wyborów łoddzielnie, a przeca godajom, co ło to samo jym sie łozchodzi. Mało tego: durś robiom ze sobom haje, wadzom sie niy ini we internecie fto jest echt Ślonzok, a fto niy, fto kogo chce łocyganić i wykorzystać, fto mo recht, a fto go niy mo. Bajzel, fulanie i gupota.
Niy cza boło dugo cekać: jedni dostali 2 procynt, drudzy 3 i zaś porażka, ale tako fest. Bezto musa wom coś pedzieć, choć wiym, co ani niy posuchocie, bo sie robicie ważni jak magi we zupie: robicie ino łostuda i gańba i to pieronowo. Ślonzoki Razem i Ruch Autonomii Śląska: dejcie sie pokój z politykom i dejcie sie zaszklić. Niy poradzicie sie dogodać, łod downa wystowiocie we wyborach tych samych ludzi, na ftorych żodyn już nie chce paczeć. Idźcie juz na pynzyjo, a do przodu dejcie ludzi mondrych i modszych. Wy juz nic dobrego niy zrobicie. Zresztom, RAŚ nawet kedyś rzondzioł na Ślonsku i co? Co z tego łostało? Ino pamiynć po kaspruwaniu jego szefa.
Komentarze