Studynty astronomii z Warszawy przijechali do Bytonia i na hołdzie ftoro łostała po Bojtnerce (fto jesce pamiynto, co melimy tako gruba?) zbuduwali się baza kosmiczno. Niy śmiyjcie sie, bo to niy ma wic. Som zech tam boł, wszystko widzioł i łosprawioł z warszawiokami.
Łoni uważajom, co na naszy hołdzie jest gynał tak samo, jak na Marsie, no prawie gynał. Bezto zbuduwali ta baza, łazom po hołdzie w takich kosmicznych arbajtancugach, smycom ze sobom jakeś urzondzynia, prowadzom badania naukowe i fedrujom roztomajte minerały. Fest sie jym tam podobo, a kurz, maras i smród ich ani trocha niy szterujom.
Jak zech tak godoł z tymi studyntami, to mi sie zrobiło gupio, co łoni nasze hołdy majom w zocy, a my niy za fest. Bo co my z tymi naszymi górami co łostały po grubach robiymy? Przyzwyczajyli my się, co som i tyla. Paczymy na nie kożdy dziyń i niywiela widzymy. Bierymy ś nich kruszywo na budowa autobany, a niyftorzi rajzujom po hołdach na quadach i na nich knipsujom. Jesce malyrze casym je malujom. Niydowno widziołzech we Radlinie wystawa łobrozów Marzeny Kuczery, ftoro maluje nojsłynniejszo ślonsko hołda, czyli Charlotta. Bo fest ji przaje.
Hołdy dużo grały tyz we filmach: z flintami lotali po nich powstańcy u Kazimierza Kutza w "Soli ziemi czarnej", widać je we filmie "Bilet na Księżyc", bez lornetka to co na nich wyrobio jedna pora łoglondo we filmie "Magnat" Bogusław Linda (fto widzioł film, tyn dobrze wiy, ło cym godom). No, a jak nasza hołda jest jak Mars, to cymu nie mieliby tu kryncić filmów ło kosmosie? Ridley Scott tego swojigo "Marsjanina" móg robić u nos.
Hołdy som piykne. Bardzo je lubia, a nawet jym przaja i chyba niy ino jo, bo skuli innych hołda w Tarnowskich Górach wpisano na lista światowego dziedzictwa UNESCO. Niy poradza sie wyobrazić Ślonska bez hołd. A przeca łone tak wartko znikajom jedna po drugi. Dejcie pozór ino u nos: niy ma juz holdy przy ulicy Siemianowickiej jak sie wjyzdzo do Bytonia z Piekor, niy ma hołdy na Rojcy. Zrekultywuwali jom. Uwijejcie sie przoć hołdom. Tak wartko sie tracom.
Komentarze