Co mie szteruje we internecie?

We internecie pisać może kożdy. Niystety, mocka ludzi z tego durś korzysto, a niy powinno, bo niy majom nic do pedzynio, a juz nojcynści majom do pedzynio same gupoty, abo niyprowdy. Niby zdowom sie z tego sprawa, niby wiym, co tak jest, a i tak sie skiz tych wpisów nerwuja, i tak mie łone fest szterujom.

Data: 12.04.2024
Autor: Tomasz Nowak
Artykuł był oglądany 148 razy

I wiym, co nojlepi takym ludziom ani niy łodpisuwać, bo sie ino pocujom ważni jak magi we zupie, a na drugi roz jesce barzi dosmolom. Ja, pisarz Stanisław Lem mioł recht, jak godoł, co keby niy internet, to nigdy by sie niy dowiedzioł, jak dużo momy na świecie gupków.

Wiadomo: nojwiyncy szterujom mie wpisy ło Ślonsku, narychtuwane przez ludzi, ftorzy znajom sie na niym jak kot na kwaśnym mlyku, abo jo na sztromie i hekluwaniu. Coś tam usłyszeli, ftoś łonym coś tam pedzioł, toz pisom: "Ślonzoki godajom po niymiecku, łod małego kożdy dziyń jedzom kluski, rolady i modro kapusta, wszyscy robiom na grubie, łoblykajom sie we mundury górnicze i śpiywajom szlagry. Nojlepi tyz po niymiecku". Jak to cytom, to wierzcie mi mom ochota wciepnonć do internetu film, na ftorym łoblecony we mundur górniczy, z czako na gowie i z gymbom zmaraszonom wonglym miksuja we gorku te rolady z kluskami, dodowom zołzy, a to co sie ś nich zrobi, wlywom do nupelflaszy i dowom bajtlowi do wypicio. A noprzód koza mu porachuwać: ajnc, cwaj, draj...

Szteruje mie tyz, jak fto pise: "w Sosnowcu na Śląsku...", abo "w Będzinie na Górnym Śląsku...", godo, co Bytoń boł w roku 1945 wyzwolony, a wceśni znod sie pod zaborami. I co Ślonzoki podpisuwali volkslista. Ja, takich mondroków, co to sie myślom, co się na wszyskym znajom, momy jak marasu.

W zeszłym tydniu jedyn taki, mie sie zdo, co nawet chop stond, a to juz cołkym źle ło niym świadcy, chcioł byc wicny i wciepnoł do internetu łobrozek i hasło: "Warszawianka jak słyszy od mężczyzny: "odpie##ol się, to się obraża, a Ślązaczka w reakcji na te słowa ładnie się ubiera". Musa pedzieć, co autor tego wpisu jest gupi jak funt kudłów. Mie sie zdo, co jak Ślonzocka usłyszy łod kogoś take prymitywne słowa, to niy ino zachowo sie jak warszawianka i sie pogorszy, ale jesce piźnie go w gymba. Zresztom co inkszego idzie zrobić chopu, ftory coś takigo godo? A ładnie się ubierze, jeśli ładnie poprosimy: "Możes sie fajnie ustroić?".

Niy wierzcie we wszysko, co przecytocie we internecie. I to niy ino ło Ślonsku.