Bytoń to niy ma hasiok

Pamiyntocie take gośne hasło: "Bytom to nie hasiok"? Piynć lot tymu Mariusz Wołosz szoł ś niym do wyborów, wygroł je i łostoł prezydyntym. Cza boło tak godać i robić porzondek, bo mielimy tu u nos fest bajzel. Roztomajte chachary i pierony jak ino chciały skludzały do nos z cołki Europy nojgorsze hasie i chowały je po hołdach i dziurach, a ludzie ciyrpieli.

Data: 17.05.2024
Autor: Tomasz Nowak
Artykuł był oglądany 220 razy

Autor zdjęcia: www.bytom.pl

Hasło boło słynne na cało Polska, a niyftorzi dowiedzieli sie, co hasiok, to po naszymu śmietnik. Keby tak cołke hasło pedzieć po ślonsku, to musiałoby brzmieć: "Bytoń to niy ma hasiok". I dzisioj to jest prowda.

Ło hasiach, czyli śmieciach i hasiokach jesce zech tu niy pisoł. Downi sprawa boła prosto. Hasie dzieloły się na dwie zorty (rodzaje): te do spolynia we piecu i te do wyciepniyncia na hasiok. I dejcie pozór: to, co łostało po polyniu we piecu razym z wonglym to tyz nazywało sie hasie, ftore bez zima suło sie na zol coby niy boło ślisko i coby żodyn sie niy łobaloł.

Ale to boło downo i niyprowda. Dzisioj żodyn ani myśli polić hasiami, bo zaro go Straż Miejsko chyci i do mu mandat, a somsiedzi sprzezywajom, co ich truje. Dziosioj hasie cza pofelezuwać (podzielić, rozdysponować) kożdy do inkszy zorty, a wiedzom juz ło tym bajtle, bo ich ucom ło tym we szkole.

Do hasioka modrego (niebieskiego) dowomy papiur (papier), papyndekle (tektury), abo stare cajtungi (gazety). Hasiok żółty jest na to, coby do niego wrazić to, co jest z metalu. Nojcynści to biksy (puszki). Ale tak po prowdzie, to niy poradza sie spomnieć, kej jo jako biksa w hasioku widzioł. Dyć zaro wysznupiom jom hasiokorze, czyli osoby zbierające śmieci. Połno momy za to we żółtych hasiokach plastiku i inkszych tworzyw sztucnych: plastikowe flaszki po napojach i mlyku, reklamtasie (reklamówki), nylonbojtle (worki foliowe), stare zabawki dlo bajtli i kupa inkszych rzecy, bo dzisioj prawie wszystko robi sie z tworzy sztucnych. Ale to sie mo ponoć juz niydugo skońcyć.

Momy jesce hasioki zielone - na szkło. Tam wciepniecie krauzy (słoiki), flaszki (butelki), blomwazy (wazony), szklonki (szklanki), abo poczaskane żadła (zbite lustra). Ino jak wciepujecie szkło, to dowejcie pozór, coby sie niy użnonć. A co zrobić z abfalami jedzynio (resztkami jedzenia), łoskrobinami, (obierkami), starymi kwiotkami, czyli bioodpadami? To jasne: dowomy je do hasioka bronotnego, czyli brązowego. A jak jesce wom co łostanie, to jest hasiok corny (czarny) na wszystko.